વિજયાદશમી – A Gujarati Poetry

ભૂતલ પર બન્યો એક કિસ્સો, રામ અને રાવણ જેનો હિસ્સો.
દોર વાતનો સંધાયો જ્યાં એ રાજા રઘુ કેરો દરબાર,
અસત્ પર સત્ ની જીતનું પ્રતિક આ વિજયાદશમી તહેવાર.

વ્હાલી કૈકેયીને ડંખ્યો સ્વાર્થ ને દશરથ છે લાચાર;
વચનને ખાતર સીતા-રામ સંગ લક્ષ્મણ છોડે ઘરબાર,
અસત્ પર સત્ ની જીતનું પ્રતિક આ વિજયાદશમી તહેવાર.

જંગલ વસતા રઘુરાય ને જાનકીની પ્રીત અપાર;
ન જાણ્યું જાનકીનાથે કાલે ઉગવાની કાળી સવાર,
લંકા કેરો રાજા રાવણ અવગુણનો ભંડાર;
રાગ-દ્વેષનાં એરુ મનમાં, ઓકે વેર ને અહંકાર.
અસત્ પર સત્ ની જીતનું પ્રતિક આ વિજયાદશમી તહેવાર.

મન આવ્યું વૈદેહી પર કે શૂર્પણખા ની તકરાર;
કારણ હજુએ અકળ એટલું, આવે ન સમજ લગાર,
જાનકીજીને હરતાં બન્યો જ્ઞાની રાવણ ગમાર;
પાપનો ઘડો છલકાયો જાણ બસ, છેલ્લો આ અત્યાચાર.
અસત્ પર સત્ ની જીતનું પ્રતિક આ વિજયાદશમી તહેવાર.

અરણ્ય મધ્યે રામ-લક્ષ્મણ ભટકે, પૂછે સીતાનાં સમાચાર;
હનુમાન તણો છે પરિચય અહીંથી, જે બન્યો ભક્તિ કેરો સાર,
મૈત્રી, ભક્તિ ને શ્રદ્ધાની સાથે સૌ કરતા ચાલ્યા ચમત્કાર;
લંકા માર્ગે પાણીને પણ લાગે ના પથ્થરનો ભાર
અસત્ પર સત્ ની જીતનું પ્રતિક આ વિજયાદશમી તહેવાર.

સમરાંગણમાં આવી ઉભા ધર્મનો ભાનુ સામે અધર્મનો અંધકાર;
રાવણ અસત્ ની કાલીમા તો, પ્રભુ સત્ નો છે અંગાર,
ભીષણ રણ ને રક્તપાત ને મોતનો બસ ચિત્કાર;
માનવ-અસુરનું બેજોડ યુદ્ધ, વિસ્મય છે પારાવાર.
અસત્ પર સત્ ની જીતનું પ્રતિક આ વિજયાદશમી તહેવાર.

દસગ્રીવ કેરો કરવાને નાશ સૌ ઝઝૂમે અપરંપાર;
વિભીષણ અહીં મદદે આવ્યા, કહ્યું ક્યાં કરવાનો વાર,
અમી કેરો કળશ છે નાભિએ, અસુરનાં જીવનનો આધાર;
વીંધે અહંનું કેન્દ્ર નરોત્તમ, સાધીને કરે પ્રહાર.
અસત્ પર સત્ ની જીતનું પ્રતિક આ વિજયાદશમી તહેવાર.

હોય દુષ્ટતા ચાહે બળવંત, ચાહે ધર્મ દીસે લાચાર;
અંતે જીત માત્ર તો સત્યની, ચાહે યુગ વીત્યા હો ચાર,
કરી પ્રયત્ન ટૂંકમાં છે કહ્યો આ રામકથા નો સાર;
સત્ નો મારગ શૂરાનો છે, માની ગયો સંસાર,
અસત્ ને પુતળે પૂળો ચાંપો, કરો લગરીકે ન વિચાર.

અસત્ પર સત્ ની જીતનું પ્રતિક આ વિજયાદશમી તહેવાર.

Love what you read? Click on stars to rate it!

Hi! I'm Swati Joshi

Love what you’re reading?
Hit star rating or just post a comment. It motivates me to write more. Thank you!

Advertisement

Older Stories

Follow Us

તહેવારો ઉજવવા એ આનંદ નો વિષય છે પરંતુ, એ તહેવારો પાછળનાં કારણ જાણીને ઉજવણી કરીએ, ત્યારે એ આનંદ સાર્થક થઇ બેવડાઈ જાય છે. સનાતન ધર્મએ જીવનને સમૃદ્ધ બનાવવા માટે ઘણું આપ્યું છે. રામાયણ પણ એ જ્ઞાનસાગરનું જ એક અણમોલ મોતી છે. વાંચો, માણો અને આનંદો!

Let’s Start Talking!

Swati Joshi is an Indian writer who loves to write in English and Indian Languages like Gujarati. Read her Gujarati Poetry and Motivational articles at Swati's Journal.
Swati Joshi

www.swatisjournal.com

0 Comments

Submit a Comment

Your email address will not be published. Required fields are marked *

Copy link
Powered by Social Snap