તું છેતરી ગયો! – A Gujarati Poetry

Written by Swati Joshi

July 2, 2018

પ્રેમનાં ફૂલોની બિછાવેલી જાજમ તળે,
કેટકેટલા કાંટા ની તરફડતી પીડા પણ;
ડગલું સુંવાળપની ઝંખનામાં માંડ્યુ જ્યાં,
વેદનાનો કાંટો મહીં સોંસરવો ઉતરી ગયો!
અજવાળું કરવાને મુખ તારું મલકતું તો,
મારી રાતોનાં તારાઓ ઓઝપાઈ જતાં;
આજે આંખો જ્યાં ફેરવી તે મારી દિશાથી ત્યાં,
મારો તો બળબળતો સૂરજ પીગળી ગયો!
પ્રેમનાં પટોળાનો કાચો ના રંગ કંઇ,
ફોરમતા ફાગણને દોરેથી બાંધેલો પણ;
તારા ઝુરાપાનાં નિંગળતા ધોધ માંહે,
પ્રેમનાં પોતનો પાક્કો રંગ પણ નીતરી ગયો!
વાતનાં વિલાસ અને વાયદાનાં સોદામાં,
તારી-મારી લેણ-દેણ નો ક્યાં કોઈ હિસાબ છે?
ચાર સ્મિત, પાંચ સ્પર્શ અને છ અશ્રુનાં બદલામાં,
લઈ આખુંએ આયખુ તું મુજને છેતરી ગયો!

Advertisement

પ્રેમ, એક એવો સોદો જ્યાં મેળવવા કરતા ગુમાવવાનું વધારે છે. છતાં, એમાં એવું કંઇક છે જે સતત આકર્ષે છે. શમા-પરવાનાની ગઝલો એમ જ નથી બની જતી. લાગણીઓનાં આ વ્યાપારમાં છેતરાવાની પણ પોતાની મજા છે… છે ને?

Copy link