જૂની તિજોરીનું એક ખાનું – A Gujarati Poetry

Written by Swati Joshi

July 25, 2019

તને સંગ્રહીને બેઠું છે જૂની તિજોરીનું એક ખાનું,
યાદોની કિતાબનું તું જાણે વાળી રાખેલું એક પાનું!
ઢગલો પડ્યા છે કારણો હસવા-રડવાનાં;
પેટી ભરીને કિસ્સાઓ તને અહીં મળવાનાં –
પણ,
એમાં સૌથી વ્હાલું મને તારા ઝુરાપાનું બહાનું!
તને સંગ્રહીને બેઠું છે…
“તું નથી જ” એવું ઘૂંટી રાખેલી મનની દીવાલ પર;
નિત-નવા રંગો ધોળાયા કરે છે –
તોયે,
લગીરે તું ઝાંખો પડે તો હું માનું!
તને સંગ્રહીને બેઠું છે…
છે તું સરળ, તો તારી યાદો કેમ જીદ્દી છે?
ભીંસીને પૂરેલી સ્મૃતિઓનાં ઓરડામાં –
એ,
કરી જ જાય છે ડોકિયું છાનું!
તને સંગ્રહીને બેઠું છે…
જવલ્લે જ ખુલતી યાદોની કિતાબમાં;
વીતી ગયેલા સમયનાં સળોની વચ્ચે –
તું,
હજીએ મહેક્યા કરે છે મજાનું!
કેમકે, તને સંગ્રહીને બેઠું છે જૂની તિજોરીનું એક ખાનું,
યાદોની કિતાબનું તું જાણે વાળી રાખેલું એક પાનું!

Advertisement

અમૃત ‘ઘાયલ’ કહે છે એમ, ‘તમે છેડી તો જુઓ સહેજ મુજ ખંડિત હૃદય-વીણા; તૂટેલા તાર માંહે પણ કંઈ ઝણકાર બાકી છે’. યાદોનાં પટારામાં ગડી વાળીને સાચવી રાખેલી ક્ષણો ઘણાને માટે પીડાનું કારણ હોય છે તો, એ જ વળી કેટલાકને માટે સંતાપનું ઓસડ પણ હોય છે. અહીં આવી જ યાદોની પળોને સાથે મળીને માણીએ અને જીવીએ.

Copy link